मेयर सा’ब कुलमानलाई चिन्नुहुन्छ ?


प्रकाशित मिति :2019-06-25 14:11:55

मेयर ज्यू, हामी तपाईंको समर्थनमा थियौं । तर यसको मतलब यो होईन कि, तपाई घोडा कुदाइ रहने र हामी मूकदर्शक भएर टुलुटुलु हेरिरहने । तपाईंको रबाफको सिलसिला यदि यसरी नै जारी भइरहने हो भने हामीले कसरी विश्वास राख्ने तपाई माथी ? तपाईं जस्तो देशको कर्मठ योद्धा, पूर्व शिक्षकले बोल्ने तरिका के यही हो त …?

उदाहरणको लागि जीविकोपार्जनको लागि हामी भैंसी पाल्छौँ । तर भैसीले मलमूत्र विसर्जनचाहिँ सधै अरुको बारीमा गर्छ भने हामीलाई के फाइदा ? दूध र मलमूत्रको लागी नै भैंसी पाल्ने हो । यदि सधैं यस्तै भयो भने आफ्नो बारीमा सागसब्जी कसरी फलाउने ?

५२ प्रतिशतको संख्या महिलाले ओगटेको देशमा तमाम महिला दिदीबहिनीकै भोटले जनप्रतिनिधि भई इटहरी उपमहानगरपालिकाको मेयर हुन सफल तपाईंले तिनै महिला दिदीबहिनीलाई महिलाकै कार्यक्रममा गएर ‘र…डी’ भन्ने ? ‘र….डी जिन्दावाद’ भन्न कहाँसम्म न्यायसंगत हो ? तपाईंलाई के अब त्यो अर्काको बारीमा गएर मलमूत्र विसर्जन गर्ने भैसीसंग तुलना गर्ने अवस्था आएकै हो त ? त्यसो भए एउटा कुरा याद राख्नुस्, तपाईंले महिला त हो ‘र…डी’ भनेको भन्दै गर्दा सम्पूर्ण महिला समेटिएका छन् । गएर सोध्नुहोस् आफ्नी आमा, श्रीमती, छोरी अनि बहिनीहरुलाई, तपाइकै शब्दमा ए ‘र…डी’हरु हो, के छ खबर भनेर ?

दाल बिक्री भएको छ ‘र…डी’ को कारणले ?

यो कुन प्रसङ्गमा भन्नुभयो म अन्योलमा छु । हरेक घरमा सधैंजसो खानामा दाल भात पाक्छ । कहिले दाल किन्न हजुरआमा जान्छिन्, कहिले आमा, कहिले १० सानी बहिनी । के उसो भए तपाइको भनाइ अनुसार त्यो दाल किन्न जाने नाबालक बहिनी, अनि ती बुढी हजुरआमा पनि ‘र…डी’ हुन् त मेयर साब ? कि तपाईंको भाषामा दाल खाने जति सबै ‘र…डी’ हुन ?

लिपस्टिक, अन्त्र–बस्त्र बिक्री भएको छ ‘र…डी’को कारणले ?

मेयरसाब लिपस्टिक र अन्त्र–बस्त्र आवश्यकता हुने र पहुँच अनुसार सारा नारीले लगाउछन् । के तिनिहरु सबै ‘र…डी’ हुन् त ? सायद तपाईंको परिवारका धेरै सदस्यहरु पनि लगाउनुहुन्छ होला लिपस्टिक र अन्त्र–बस्त्र । अब तपाई के भन्नुहुन्छ ? तपाईंको यस प्रकारको बोलीले सबै महिलालाई आघात पुगेको छ ।

कन्डम, पिल्स बिक्री भएको छ ‘र…डी’को कारणले ?

कन्डम र पिल्स परिवार नियोजनका अस्थायी साधन हुन् । सन्तानको चाहाना पुगेको र असुरक्षित यौन सम्पर्कबाट बच्नको लागी यी चिजहरु प्रयोग गरिन्छ । यहाँको भनाइ अनुसार के यस्ता साधन प्रयोग गर्ने बुवा–आमा, काका–काकी, मामा–माइजू, दिदी भिनाजु, दाई–भाउजु पनि ‘र…डी’कै दर्जाका हुन् त ? र अर्को कुरा नेपाल सरकारको स्वास्थ्य तथा जनसंख्या मन्त्रालयले परिवार नियोजनको साधन प्रयोग गर्नुहोस् भनेर ‘जनहितमा जारी सन्देश’ भन्छ । के यस्ता कार्यक्रम, प्रचार–प्रसार रेडियो, टीभी, पत्रपत्रिकामा बिज्ञापन गर्दै हिँड्नु मात्र ठिक हो । यो कुराको महत्व बुझेर सतर्कता अपनाएर कन्डम र पिल्स किन्नुचाहिँ ‘र…डी’ले गर्ने काम हो ? सरकारले कन्डम निःशुल्क बाँडिरहेको छ । अब यस्तो अवस्थामा ‘र…डी’ कसलाई भन्ने मेयरसाब ? के अब तपाई सरकारमाथी पनि प्रश्न उठाउनुहुन्छ ? जसरी प्रत्येक व्यक्तिको तौल तराजुले जोख्दा फरक–फरक हुन्छ त्यसरी नै मानिसको बानी र व्यबहार पनि फरक–फरक हुन्छ भन्ने कुरा मनन् होस यहाँलाई । होलान् केही त्यस्ता अनैतिक काम गर्नेहरु पनि । तर सबैलाई एउटै तराजुले जोख्न खोज्ने मेयर सा’बको शब्द चयन र बोली ‘….लाई भन्दा देख्नेलाई लाज भनेजस्तो’ हो ।

शब्द चयन खोई ?

‘मलाई आउदैन । म ठकुरीको छोरा हुँ र ? मलाइ राम्रो बोल्न आउदैन । म थारुको छोरा हुँ, के भनेको यस्तो ? ‘तपाई जस्तो जनप्रतिनिधि, जनताको भोटले विजयी भएको उपमहानगरपालिकाको मेयर जस्तो व्यक्तिले तिनै भोट दिने जनतासँग सभ्य, नम्र भएर बोल्न आउदैन ? भोट माग्ने बेला त खुबै नम्र हुनुभयो होला । त्यतिखेर राम्रो बोली र शब्द पनि निस्के होलान् । अहिले के भयो त ? राम्रो बोल्न आउदैन भने सिक्नुस, कम बोल्नुस । तर जथाभावी नबोल्नुहोस् । तपाईंको बोली नै तपाईंको लागि गलपासो भाको छ ।

कुलमान घिसिङलाई तपाइ पनि चिन्नुहुन्छ होला । उनी त ठकुरीका छोरा होइनन्, तामाङ (लामा) हुन् । कति शिष्ट र सभ्य भाषामा बोल्छन् । यदि तपाइकै तरिकाले लिङ्ग र योनीलाई पनि ठाडो भाषामा बोल्दै हिँड्यो भने समाजले त के तपाईं स्वयंले पचाउनुहोला त ?सभ्य भाषा बोल्न ठकुरीलाई मात्रै आउँछ भन्ने सोच कहाँसम्मको संकिर्ण हो ? कोही खास जाती, क्षेत्र र लिंगको हुँदैमा उसलाई राम्रो नराम्रो गर्न आउने नआउने भन्ने हुँदैन । राम्रो बोली र व्यवहार भनेको मान्छेको संस्कार र विवेकले निर्धारण गर्ने कुरा हुन् ।

स्मरण रहोस् केही समय पहिले तत्कालीन कानूनमन्त्री शेर बहादुर तामाङले अपाच्य शब्द प्रयोग गरेकोमा पदबाट राजीनामा दिएका थिए । तपाईंचै आफ्नो गल्ती स्विकार्न नसक्ने ? तपाईंलाई २९ पटक ‘र…डी,’ र ‘र…डी जिन्दावाद’ भन्न कसले छुट दियो ? तपाईंले महिला दिदीबहिनी भएकै कार्यक्रममा त यसरी जथाभावी बोल्नुहुन्छ भने, महिला विरुद्ध पर्दा पछाडि तपाईंका गतिविधी कस्ता होलान् ? सोचनीय विषय भएको छ ।

त्रीयुगा २, उदपुर

    Comment Here!

Related NEWS
मुख्य खबर

महिला उद्यमीले अर्थतन्त्रमा पुर्‍याएको योगदानको कदर हुनुपर्छः आयुक्त तिम्सिना

सानो लगानीबाट व्वसाय सुरु गरि सफल भएका व्यवसायी महिलाहरूले आफ्नो व्यवसाय स्थापना गर्न परिवार र

साबित्री थापाः एउटा चुपचाप संघर्ष

-बिमला तुम्खेवा- यसो भनिरहँदा उनी गम्भीर त देखिइन् । तर पनि अनुहार भने भ्रममुक्त थियो ।

यसरी मनाईयो पुरुष दिवस

विषादीयुक्त पुरुसत्व (Toxic Masculinity) ले पुरुषहरुलाई पनि असर गरिरहेको र लैंगिक समानताका विषयमा पुरुषहरुमा रहेको

भारतमा गरिब बालिकाले कक्षाकोठामा चियाइरहेको भाइरल तस्बिरको वास्तविकता यस्तो छ

यी पाँच वर्षीया बालिका रित्तो भाँडा बोकेर एउटा स्थानीय सरकारी विद्यालयको कक्षाकोठाबाहिर उभिएर भित्र चियाइरहेको

महिला नेतृत्व स्थापित गर्ने ऐतिहासिक अवसरः पाण्डे

भट्टराई राजनीति र समाजको गहिरो अध्ययन भएकाले उनमा समृद्धिको खाका कोरेर अगाडि बढ्न सक्ने क्षमता

Read more
ताजा अपडेट
© 2015.All rights reserved by mahilakhabar.com
%d bloggers like this: