अशक्त आमालाई छोराबाटै बलात्कारको धम्की


प्रकाशित मिति :2019-06-20 15:53:08

–महिला खबर–

ललितपुर । आमा ती मात्रै होइनन्, जसले पेट बोकेर जन्म दिन्छिन् । आमा त ती पनि हुन् जसले हात समातेर हिँड्न सिकाउँछिन् । खान, लाउन सिकाउँछिन् र कर्म गर्न पनि । तर जब तिनै छोराछोरी ठूला हुन्छन्, हुर्काउने र कर्म गर्न सिकाउनेको योगदान भुलिदिन्छन् अनि ज्यानै मारिदिने धम्की दिन्छन् भने तिनै आमाको मन कति दुख्छ होला ?

ललितपुरको यस्तै घटनाले जो कोहीको मन दुख्छ । आफूले पेटबाट मात्रै नजन्माएका तर एक आमाले निर्वाह गर्नुपर्ने सबै भूमिका निर्वाह गरी हुर्काएका श्रीमानका छोराहरूबाट एक अशक्त आमा प्रताडित छन् । कुटपिट मात्रै होइन, पटक–पटक बलात्कारको धम्की खेपिरहेकी उनले अन्ततः आफ्नो उद्धारका लागि अपिल गरेकी छन् ।

ललितपुरको डल्लुकी ४७ वर्षीया एकमाया थापा महर्जनले घर छोडेर नगए बलात्कार गरेर ज्यान मारिदिने धम्की आइरहेको भन्दै न्यायका लागि पहल गरेकी हुन् ।

सौतेना छोरा रामेश्वर महर्जनले घरबाट नगएको खण्डमा बलात्कार गरेर मारिदिन्छु भन्दै रातदिन धम्की दिने गरेकोले ज्यान जोगाउनै मुस्किल भएको एकमायाले महिला खबरसँगको टेलिफोनमा बताइन् ।

पाँच वर्ष अघि कम्मरको नसा सुकेपछि उठ्न, बस्नसमेत अर्काको सहारा चाहिने अवस्थाकी एकमायाले भनिन्, ‘एक्लै दिसा पिसाब गर्न त जान सक्दिन । घरै छोडेर म कहाँ जाऔं ?’ उनले घरमा कतिबेला के हुने हो भन्ने यकिन नभएका कारण बरु आफ्नो लागि सहारा स्थल खोजिदिन समेत आग्रह गरिन् ।

६३ वर्षीय श्रीमान रामराजा मर्हजनले जेठी श्रीमतीको मृत्यु भएपछि २०५२ सालमा उनीसँग बिहे गरे । बिहेको करिब १२÷१३ वर्ष सुःख शान्ति नै थियो । जब एकमायाबाट जन्मिएकी एउटी छोरी ठूली हुँदै गइन्, अनि परिवारले सम्पती खान जन्मिएकी भन्दै आमा–छोरीलाई नै प्रहार गर्न थाले ।

एकमायालाई सौतेना छोराछोरीको व्यवहारले भन्दा बढी श्रीमानको मौनताले दुख्छ । सँगै जीवन बिताउने कसम खाएर पाँच छोराछोरी हुर्काउने जिम्मासहित भित्र्याएकी आफूमाथि छोराहरूले निकै तल्लो स्तरको व्यवहार गर्दा समेत मुख खोल्दैनन् । ‘तिमीहरूको आमा हो । तिमीहरूका लागि त्याग गरेकी छ समेत भन्दैनन्’ उनले पीडा पोखिन् ।

एकमायाका अनुसार उनको बिहे हुँदा रामराजाका चार छोरा र एक छोरी मध्य कान्छो छोरा महेश दुई वर्ष थिए । उनी एक वर्षको छँदा आमाको मृत्यु भएको थियो । ‘त्यति नाबालकलाई हुर्काए, बढाए । अहिले तिनै छोराछोरीबाट ज्यान जोगाउन मुस्किल छ’ एकमायाले रुँदै महिला खबरलाई भनिन् ।

जेठो छोरा रामेश्वर महर्जन गाली बेइज्जती मात्रै गर्दैनन्, कुटपिट पनि गर्छन् । ‘तीन वर्ष अघि बुबाकै अगाडि तलाईं बलात्कार गरिदिन्छु भन्दै पाइन्ट खोलेर झम्टिन आयो । बल्लतल्ल जोगिएँ । कुटाइ त कति हो कति । कुन दिन मार्छ थाहा छैन’ उनले भनिन् । तर श्रीमान रामराजा भने छोराहरू बिरुद्ध एक शब्द पनि बोल्न नसक्ने उनले बताइन् । बरु समाजका अगाडि मलाई केही थाहा छैन भन्दै आफूलाई नै नराम्रो बनाउन खोज्ने गरेको गुनासो गरिन् ।

चार मध्य साइलो छोराको मृत्यु भइसक्यो । उनकी श्रीमती बिनिताले भने अहिलेसम्म नराम्रो नगरेको एकमायाले बताइन् ।

कान्छो छोरा महेशले केही दिन अघि ‘तँ निस्किनस् भने घाँटी च्यापेर मारिदिन्छु’ भन्दै टीभी फुटाएर फालिदिए तर हात भने हालेका छैनन् ।

एकमायाका अनुसार काइलो छोरा अजयले पनि पटक–पटक घरबाट निस्के भन्दै कुटपिट र गाली बेइज्जती गरिरहन्छन् । छोरी मनिकाले पनि आमा भनेर सम्मान गर्दिनन् ।

आफूबाट जन्मेकी एक मात्रै छोरीलाई समेत सौतेना दाजुहरूले सुखले बस्न नदिएपछि गएको मंसिर महिनामा बिहे गरिदिएको उनले बताइन् ।

सात वर्ष अघि मृत्यु भएका साइला र जेठा छोरा जहिले पाइन्ट खोलेर बलात्कार गर्न आउँथे । ‘दुबै जना जहिले नसामा हुन्थे । हामी त ड्रग खान्छौं । तलाईं एड्स सारिदिन्छौं भन्थे । जेठो त अहिले पनि त्यस्तै भन्छ’ एकमायाले भनिन् ।

महिला आयोग र प्रहरीको वेवास्ता

छोराहरूको यातना, धम्की र श्रीमानको बेवास्ता विरुद्ध एकमाया नबोलेकी होइनन् । २०७५ भदौ र चैतमा गरेर तीनपटक ह्वील चिअरमा दुःख बिसाउन राष्ट्रिय महिला आयोग पनि पुगिन् । तर आयोगले सबैलाई बोलाएर दुईपटक मिलापत्र गरेर पठाइदियो ।

त्यस्तै स्वयम्भू प्रहरीले पनि जहिले जाँदा मिलापत्र गरेर पठाइदिने गरेकोले न्यायको आसै मरेको एकमायाको गुनासो छ ।

‘अशक्त शरीरमाथि पटक–पटक लात्ता प्रहार भएको कुराले प्रहरी र महिला आयोगलाई छुन्न । न्याय माग्न अन्त कहाँ जाने केही थाहा छैन’ उनले भनिन् ।

एकमायाले आफूमाथिको यातना नरोकिएपछि अहिले ललितपुर जिल्ला अदालतमा अंश मुद्दा दर्ता गराएको बताइन् । ‘अंश खान्छे भनेरै यति गरेका हुन् । कतैबाट न्याय नपाएपछि अंश मुद्दा हालेकी हुँ’ उनले भनिन् ।

‘अशक्त शरीरमाथि पटक–पटक लात्ता प्रहार भएको कुराले प्रहरी र महिला आयोगलाई छुन्न । न्याय माग्न अन्त कहाँ जाने केही थाहा छैन’ उनले भनिन् ।

शौचालय जानका लागिसमेत अरुको सहारा चाहिने अवस्थाकी एकमायालाई बिहे गरेर पठाइसकेकी छोरी आएर नै दिनदिनै स्याहार्छिन् । कहिलेकसो तल्लो तलामा भाडामा बस्ने मान्छेले चिया नास्ता खान दिने र सहयोग गर्ने गरेको थाहा पाएपछि परिवारले माथि आउने सिंढीको ढोकामा चाबी लगाइदिने गरेका छन् ।

आफूलाई त्यो यातना घरबाट मुक्ति दिलाइदिनका लागि अरुसँग मागेर अभियन्ता साबित्री सुवेदीलाई फोन गरेको र असार ३ गते साबित्री आफ्नो घरमा पुग्दा छोराहरूले नसा सेवन गरेर झण्डै हात हालेको पनि एकमायाले बताइन् ।

‘त्यसपछि घरमा कुटपिट र कलह भयो । अहिले काठमाडौंमा आफन्तकोमा लुकेर बसेकी छु । घर जान सक्दिन । मेरो लागि बस्ने व्यवस्था गरिदिनुस्’ एकमायाले भनिन् ।

    Comment Here!

Related NEWS
मुख्य खबर

आफ्नै कथा विमोचन गर्नुभो हजुरआमाले

पुस्तकमा ८० वर्ष कटेका महिलाका कथा समेटिएको छ । किताबमा समेटिएका पात्रहरू (हजुरआमा)ले नै किताब

संचारिकाका पहिलो निर्वाचित अध्यक्ष बन्दना राणालाई जनसेवा श्री

-महिला खबर- संयुक्त राष्ट्रसंघीय समितिमा उपाध्यक्ष पदमा निर्वाचित हुने राणा नै पहिलो नेपाली हुन् ।

नेपालको पहिलो रेस्लर महिला भगवतीलाई सुप्रवल जनसेवा श्री

राष्ट्रिय जीवनका कुनै पनि क्षेत्रमा प्रशंसनीय काम गर्ने नेपाली नागरिक वा नेपालको हितमा विशेष योगदान

पत्रकार पण्डित र पुन सुप्रवल जनसेवा श्रीबाट विभुषित हुने

-महिला खबर- यो सम्मान आगामी बैशाख महिनामा प्रदान गरिने छ ।

संविधान दिवसमा प्रधानमन्त्रीले यसो भने (मन्तव्यको पूर्ण पाठ)

धेरै पटक भनेको छु, मैले मृत्युलाई नजिकैबाट देखेको छु । जनबोलीमा भन्नुपर्दा पटक–पटक मरेर बाँचेको

Read more
ताजा अपडेट
© 2015.All rights reserved by mahilakhabar.com
%d bloggers like this: