महिलाका समस्याको मुख्य कारक मदिरा


प्रकाशित मिति :2018-10-23 13:26:01

-बिर्मलादेवी बुड्थापा-
उपप्रमुख, साँफेबगर नगरपालिका अछाम

महिलाको सवालमा सबैभन्दा बढी हुने भनेको हिंसा नै हो । साँफेबगर नगरपालिकामा सबैभन्दा बढी हिंसा हुने कारण मदिरा हो । पुरुषले मदिरा सेवन गरेर दिनभरी हल्लिने साँझ घरमा आएर श्रीमतीलाई पिट्ने गर्छन् । यसले महिला मात्रै होइनन्, बालबालिका पनि उत्तिकै जोखिममा छन् ।

मदिरा नियन्त्रण गर्नको लागि जिल्ला समन्वय समितिदेखि लिएर नगरपालिकाका विभिन्न वडामा छलफल गरिरहेका छाैँ। हुन त पहिलेको जस्तो चरम हिंसामा यहाँका महिला छैनन् । विस्तारै महिला स्वयं पनि बुझ्दै छन् भने पुरुषमा पनि यो चेतना आइसकेको छ ।

हामी नगरपालिकाका विभिन्न वडामा गर्ने छलफलमा पनि महिलासँग छलफल गर्ने गर्छौं । तपाईहरुका समस्या के छन् भनेर सोध्ने गरेका छौँ ।

हिजो अस्तिको जस्तो अब छैन । यदि तपाई कसैलाई केही समस्या छ भने हामीलाई भन्नुहोस् हामी तपाईलाई न्याय दिलाउँछौ भन्दै हामी छलफल गर्ने गरेका छौं ।

विद्यालय उमेरका किशोर, युवाहरुले पनि मदिरा सेवन गर्ने गरेको पाइन्छ । भने, कतिपय कर्मचारी मदिरा सेवन नै गरेर कार्यलयमा जाँदा कार्यलयको कामकाज नै प्रभावित हुने गरेको छ । त्यसैले अफिस, विद्यालय जाने समयमा मदिरा बिक्री वितरणमा रोक लगाएका छौँ ।

मदिरा बेचविखन गर्न निश्चित समय तोकेका छौं । बेलुका ६ बजेपछि मात्र मदिरा बेचविखन गर्न पाईने नियम बनाएका छौँ । त्यो समय भन्दा तलमाथि मदिरा बेचविखन गरेको पाइएमा जरिबाना तिर्नुपर्ने हुन्छ ।

नगरपालिकाले महिला नेतृत्व विकासका लागि सीपमुलक आय आर्जन लगायतका विभिन्न क्षमता विकासका कार्यक्रम सञ्चालन गरिरहेको छ ।

‘कपालदेखि कम्प्युटर’ शिर्षकमा आवश्यक बजेट छुट्याएर काम गरिहेका छौँ । महिलाले आयआर्जन सीप मात्रै सिकेर हुँदैन विभिन्न प्रविधिमा पनि जोडिनुपर्छ भन्दै महिलाहरुका लागि कम्प्युटर तालिम दिएका छौं ।

नगरपालिकाका महिलाहरु सबैलाई एकै पटक सम्भव नभएकाले वडा वडाबाट महिला छनौट गरेर कम्प्युटर सिकाईरहेका छौँ । तीन महिनाको बेसिक कोर्स सिकाएर राम्रो नम्बर ल्याउनेलाई पुरस्कार पनि दिएका छौँ ।

महिला दिदीबहिनीहरुका लागि साँफेबगर नगरपालिकाले अब मोबाइल एप निर्माण गर्दैछ । आफु माथि भएको हिंसाबारे घरमै बसेर पनि जानकारी गराउनका लागि एपले सहयोग गर्ने छ भन्ने हामिले विश्वास लिएका छौँ ।

नगरपालिका भित्र रहेका दलित, महिला, युवा, बालबालिकाहरुलाई मध्यनजर गर्दै नगरपालिकाले आवश्यक बजेट विनियोजन गरि उनीहरुको क्षमता अभिबृद्धिका कार्यक्रमहरु सञ्चालन गरिरहेको छ ।

महिलाको जबसम्म आर्थिक अधिकार हुँदैन तबसम्म अवस्था कमजोर हुन्छ । आर्थिक अवस्था बलियो बनाउन सबैभन्दा पहिले हातमा सीप हुनुपर्छ । त्यही सीप सिकाउन हामीले महिलालाई, सिलाई कटाइ, लगायतका विभिन्न सीपमुलक तालिम दिरहेका छाँै जसबाट उनीहरुले आयआर्जन गर्न सकुन् ।

नगरपालिका भित्रका सबै महिलालाई हामीले रोजगार दिन सक्दैनाैं । हामीले गरिब, एकल, पछाडी परेका, एकल महिलालाई लक्षित गर्दै सीपमुलक तालिम दिइरहेका छौं । जसले यो तालिम लिएर पछिसम्म आत्मनिर्भर बन्न सकुन् ।

थोरै लगानीबाट भोलीका दिनमा केही गर्न सकुन् । अरुको अगाडि हात थाप्न नपरोस् । आर्थिक पहुँचमा महिला नहुँदा उनीहरुले विभिन्न किसिमका हिंसा सहनु परेको हामीले देखिरहेका छौँ ।

साँफेबगर नगरपालिकाले सुचना केन्द्र पनि स्थापना गरेको छ । नगरपालिकामा भइरहेका क्रियाकलापबारे नगरका नागरिकले जानकारी पाउन् भन्ने उद्देश्यले सुचना केन्द्रको स्थापना गरिएको हो ।

अछामलाई बदनाम गर्ने छाउपडी

छाउ प्रथा देशभर छ । काठमाडौंमा पनि यो प्रथा छ । तर, सुदुरपश्चिम त्यसमा पनि अछाम जिल्लालाई छाउपडीको नाममा बदनाम पारिएको छ यसमा मेरो आपत्ती छ ।

जति छाउपडीको नाममा अछामको गलत प्रचार भएको छ । यस्तो कदापी छैन । अहिले यहाँका नागरिक पनि सचेत भइसकेका छन् । आफ्ना महिला दिदीबहिनीहरुलाई कसरी सुरक्षित तरिकाले राख्ने भन्नेमा पुरुष दाजुभाइहरुपनि लागिरहेका छन् ।

अझै पनि छाउगोठमा बस्ने चलन कतै छ भने यसको लागि पनि हामीले खोजबिन गरिरहेका छौँ । खोजबिनका लागि साँफेबगर नगरपालिकाका हरेक वडामा निगरानी समिति गठन गरेका छौँ ।

यो समितिले आ–आफ्नो वडा टोलमा भएका समस्याबारे निगरानी गर्ने काम गरिरहेको छ । अझै यो चलन कतै छ भने हामी जनचेतनामुलक लगायतका के कार्यक्रम सञ्चालन गर्नुपर्ने हो त्यसका लागि लागिरहेका छौँ ।

महिलाहरु महिनावारी भएको बेला कहाँ, कसरी बसिरहेका छन् भन्नेबारे नगरपालिकाले सबै वडामा गएर अनुगमन गर्ने काम जारी राखेको छ । अनुगमनका क्रममा साँफेबगर नगरपालिकाको वडा नम्बर १२ खप्तडमा जाँदा त्यहाँका सबै महिला बच्चा जन्माउँदा वा महिनावारी हँुदा घरमै बस्ने गरेको पाइयो । त्यही उदाहरण हामी सबै वडामा दिएर चेतना जगाई रहेका छौँ ।

जसले महिला महिनावारी हुँदा गोठमा राख्छ उसलाई नगरबाट दिने सेवा सुबिधाबाट वञ्चित गरिने निर्णय पनि नगरपालिकाले गरेको छ ।
न्यायिक समितिको संयोजक पनि म आफै छु । अहिले यहाँका महिला आफुमाथि कसैले हिंसा, दुव्र्यवहार गरे नगरपालिकामा आउनुहुन्छ । अनि हामी कस्तो समस्या हो ? कसले के गरेको हो ? भन्ने खोजबिन गर्छौं ।

पीडा दिने व्यक्ति र पीडा पाएको मान्छे दुबैजनालाई बोलाएर छलफल गर्ने गर्दर्छौं । सामान्यतया साँफेबगर नगरपालिकामा श्रीमान् श्रीमती, सासू बुहारीका घटना आउने गर्दछन् । यस्ता घटना हामी दुवैपक्ष बेलाएर मेलमिलाप गर्ने गर्दछौँ । नगरपालिकामा नमिल्ने ठुला मुद्धा भए वकिल बोलाएर पनि हामी छलफल गर्ने गरिरहेका छौँ ।

(इन्द्रसरा खड्काले गर्नुभएको कुराकानीमा आधारित)

    Comment Here!

Related NEWS
मुख्य खबर

‘बैठकमा कुरा सुन्यो, घर गयो’

-कल्पना भट्टराई- नगर र वडाबाट दलित लक्षित योजनाका प्रस्ताव अघि सार्दा ‘जनप्रतिनिधिले दलितको मात्रै काम गरेर

यौन शोषणको भिडियो नै दिएपछि भारतका पूर्व मन्त्री पक्राउ

यसअघि स्वामी चिन्मयानन्ले उनीविरुद्ध षड्यन्त्र भइरहेको बताएका थिए ।

बलात्कार कसुरमा साढे सात वर्ष कैद सजाय

मानसिकरूपमा कमजोर २७ वर्षीया युवतीमाथि बलात्कार गर्ने ७० वर्षीय हङ्कुर योगी भन्ने भक्तबहादुर योगी (जोगी)

हेर्नुस् दुई पुरुषबाट महिलाको यो हालत

–महिला खबर– श्रीमान बिरेन्द्र ऐर र ससुरा हुकुम ऐरले बारीमा लगाएको मकै किन खाएको भन्दै कुटपिट

बलात्कार कसुरमा १० वर्ष जेल

-महिला खबर- स्याङ्जा । १९ वर्षीया किशोरीलाई बलात्कार गरेको कसुरमा जिल्ला अदालत स्याङ्जाले एक जनालाई १०

Read more
ताजा अपडेट
© 2015.All rights reserved by mahilakhabar.com
%d bloggers like this: