‘साइपाल’ चढ्ने पहिलो आरोही बन्दै सुदूरका चेली’


प्रकाशित मिति :2018-10-09 10:19:22

–इन्द्रसरा खड्का–

ललितपुर । प्रदेश नम्बर सातका प्रमुख पर्यटकीय स्थलको रुपमा परिचित ‘साइपाल’ हिमालको आरोहणका लागि बझाङका चेलीहरूको तयारी अन्तिम चरणमा छ ।

बझाङमा रहेको साइपाल हिमाल चढ्ने योजनाका साथ लागिपरेका बझाङका चार जना युवतीको तयारी अन्तिम चरणमा पुगेको हो ।

बझाङको तल्कोट गाउँपालिका वडा नम्बर १ की २० वर्षीया सरस्वती थापा, सुर्मा गाउँपालिका वडा नम्बर ३ की २० वर्षीया पवित्रा बोहरा, साईपाल गाउँपालिका वडा नम्बर ३ की २६ वर्षीया लक्ष्मी बुढा र साईपाल गाउँपालिका वडा नम्बर ४ की २० वर्षीया संगिता रोकाया साइपाल हिमालको आरोहणका लागि तयारीको अवस्थामा छन् ।

 

यही असोज ३१ गते साइपाल हिमाल चढ्ने तयारीमा रहेका चारै जनालाई रारा फिल्मस् प्रा.लिले यो हिम्मत र अवसर जुटाएको हो । हिमाल कसरी चढ्ने, हिमाल चढ्न कुन कुन तरिका अपनाउने, हिमाल चढ्दा के कस्ता जोखिम हुन सक्छन् भन्ने विषयमा उनीहरूले काठमाडौंमा तीन महिनाको तालिम पनि लिइसकेका छन् ।

हिमाल चढ्ने मौका पाएपछि बझाङी चेलीहरू यति बेला निकै उत्साहित छन् । गत हप्ता काठमाडौंमा भेटिएको उनीहरूको टोलीका चारै जना युवतीहरू हिमाल चढ्ने पहिलो नेपाली बन्न आतुर देखिन्थे ।

‘साँझ बिहान घर भित्रैबाट देखिने साइपालको चुचुरोमा टेक्न सकिन्छ भन्ने त सोचेकै थिएनौं’ हिमाल चढ्ने तयारी गर्न काठमाडौं पुगेकी संगीता रोकायाले महिला खबरसँग भनिन् ‘रारा फिल्मस्को प्रस्तावले सपना देख्ने र पूरा गर्ने हिम्मत जुटाइदियो ।’

यसरी जुर्यो हिमाल चढ्ने हिम्मत

रारा फिल्मस् प्रा.लि.ले ‘मिसन साइपाल’ नामक चलचित्र बनाउन लागेको थियो । सुदूरका पहाडी जिल्लामा छोरीहरूले अग्ला हिमाल चढ्नु हुन्न भन्ने रुढिवादी मान्यताको अन्त्य भइसकेको छैन ।

यही अन्धविश्वासलाई चिर्न राराले बनाउन लागेको फिल्मका लागि युवतीहरू चाहिएको कुरा बझाङका रेडियोमार्फत विज्ञापन बज्यो ।

विज्ञापन सुनेर १५ जना युवतीले निवेदन दिए । जसबाट सरस्वती, पवित्रा, लक्ष्मी र संगीता छानिए ।

आफू फिल्मका लागि छनौट भइसकेपछि निर्देशक भोजराज भाटले तिमीहरू साइपाल चढ्नुपर्छ भन्दा विश्वासै लागेन । सरस्वतीले भनिन्, ‘कल्पना नै नगरेको कुरा सुन्दा विश्वासै लागेन । दाजुले फिल्म यस्तो हो । तिमीहरूले यस्तो गर्नुपर्छ भनेर सम्झाई बुझाई गर्नुभो । अनि मात्रै हो रहेछ भन्ने भो ।’

‘यार्साको सिजनमा यार्सा टिप्न २, ३ महिना जति लेकमा जान्छौ‌ । साइपाल हिमाल चाँदी झैं टल्लक टल्किन्छ । यो हिमालको टुप्पोमा पुगेको भए कहाँ कहाँ देखिन्थ्यो होला भन्ने लाग्थ्यो ।

अहिले त्यही हिमाल चढ्न पाउने कुराले निकै उत्साहित छु’ पवित्राले भनिन्, ‘यार्सा टिप्दै गर्दा देखेको हिमाल चढ्न पाउने कुरा सोच्दा त सपना जस्तै लागेको छ । म त साँच्चै भाग्यमानी नै हुँ भन्ने लागिरहेको छ ।’

यार्सा टिप्न हिमाली भेगमा गएका बेला महिनावारी भएको खण्डमा घर फर्किएको विगत सम्झिँदै पवित्राले भनिन्, ‘यो अन्धविश्वास हो भन्ने थाहा नै थिएन । भोजराज दाजुले आँखा खोल्दिनु भो । हामी त्यसलाई साबित गर्न लागिपरेका छौं ।’

अग्ला स्थान र टाकुराहरूमा देवताको बास हुन्छ भन्ने मान्यताका कारण महिलाहरू अग्ला टाकुराहरूमा नजाने गरेको रारा फिल्मका प्रबन्ध निर्देशक भोजराट भाटले बताए ।

पत्याएनन् परिवारले

फिल्मका लागि आफूहरू हिमाल चढ्न लागेको कुरा घरमा भन्न निकै डराए उनीहरू । तर घरमा नभनेर सुखै थिएन । घरको अनुमति बिना डेग नचल्ने उनीहरूलाई बुबाआमाको स्वीकृति अनिवार्य थियो । अनि चारै जनाले घरमा भन्ने आँट गरे ।

यो कुरा परिवारले सहजै स्वीकार गरे त ? प्रश्न भुईँमा खस्न नपाउँदै लक्ष्मीले भनिन्, ‘सुरुमा त गाली खाएँ । नचाहिने नचाहिने काम । कसले सिकायो यस्ता कुरा भन्नुभो । तर, अवसर पाएकाले म जसरी पनि हिमाल चढ्छु भन्ने ढिपी कसेपछि उहाँहरू हुन्छ भन्न बाध्य हुनुभो ।’

साइपाल चढ्ने पहिलो नेपाली

साइपाल ७ हजार ३१ मिटरको उचाइमा छ । अहिलेसम्म यो हिमाल कसैले आरोहण गरेको आधिकारिक जानकारी छैन ।

नेपाल पर्यटन विभागको आधिकारिक जानकारीमा सरकारको इजाजत लिएर कसैले पनि साइपाल आरोहण नगरेको नेपाल पर्यटन विभागले जनाएको छ ।

यो भन्दा पहिले विदेशी पर्यटकहरूले हिमाल चढ्ने प्रयास भने गरेको सुनिएको छ । विभिन्न ८ समूहले हिमाल चढ्न हिँडेका भए पनि दुई समूहमात्र सफल भएको सुन्नमा आएको छ ।

तर, सरकारी तथ्यांकमा भने अहिलेसम्म कसैले पनि साईपाल हिमाल चढेको नदेखिएको रारा फिल्मस् प्रालिका प्रबन्ध निर्देशक भोजराज भाटले बताए ।

‘यो मिसन सफल भएमा बझाङी चेलीहरू आधिकारिक रूपमा साइपाल चढ्ने पहिलो नेपाली हुनेछन्’ मिसन साइपालका निर्देशक भाटले उत्साहित हुँदै भने, ‘महिलाले अग्ला ठाउँमा जानु हुन्न भन्ने अन्धविश्वास चिर्न र महिलाहरू पनि गर्न सक्छन् भन्ने साबित गर्न यो फिल्म बनाउन लागेका हौं ।’

चारै जना महिलाहरू यही अक्टोबर १७ मा साइपालको बेस क्याम्प जाने तयारी छन् । टोलीमा पर्यटकसहित २८ जना हुनेछन् र बेस क्याम्पमा उनीहरूले ३५ दिन बिताउनेछन् ।

उनीहरूको यही यात्रामा केन्द्रित भएर ‘मिसन साइपाल’ फिल्मस् पनि बनाइने रारा फिल्मस्ले जनाएको छ ।

    Comment Here!

Related NEWS
मुख्य खबर

रुढ मान्यता भत्काउँदै शान्तिले मनाइन् दसैँ

–महिला खबर– बझाङको सुर्मा गाउँपालिका वडानम्बर १ की शान्तिले सोही गाउँपालिका ३ मा रहेको

कारबाहीमा होइन पैसामा न्याय !

-चन्द्रकला शाह- बाजुरा । पैसामा घटना मिलेपछि महिलाले थप लाञ्छना भोग्ने गरेका छन् ।

घरेलु हिंसा पीडित सीता मृत भेटिइन्

–महिला खबर– ललितपुर । बैतडीको मेलौली नगरपालिका ३, की सीता भट्ट हराएको डेढ महिनामा मृत भेटिएकी

‘श्रीमती’ को रूपमा बेचिँदै कलिला छोरीहरू

ललितपुर । नाइजेरियामा एउटा परम्परा छ । जसलाई ‘पैसाको लागि विवाह’ नामले चिनिन्छ । उक्त

आज दसैँको टीका

राष्ट्रपति विद्यावी भण्डारीले उपराष्ट्रपति, प्रधानमन्त्रीदेखि उच्च पदस्थ व्यक्तित्वहरुलाई टीका लगाइदिएकी छन् ।

Read more
© 2015.All rights reserved by mahilakhabar.com
%d bloggers like this: