पुरुषको चरित्र हुँदैन ?


प्रकाशित मिति :2018-05-28 15:54:33

– सुनिता मैनाली –

मानिस जन्मँदा स्वतन्त्र हुन्छ । कुनै जात, धर्म, वर्ण, भुगोल आदिको आधारमा प्रकृतिले विभेद गरेको देखिँदैन । समाज विकास क्रमसँगै मानिस स्वयंले सामाजिक नियमहरुको प्रतिपादन गर्यो ।

तीनै नियमहरुले उनीहरुको सोचाइ, व्यवहार, संस्कार र अन्य क्रियाकलाप निर्धारण गर्यो । तीनै सोचाइ र संस्कारको कारण समाजामा धेरै असमानताहरुले जरो गाडेर बसेको छ । समाजका असंख्य असमानताहरु मध्ये महिला र पुरुषहरुवीचको विभेद मुख्य हो । जुन वर्षौंदेखि चर्चाको विषय बन्दै आएको छ ।

पुरुष वर्गको श्रोत र सत्तामा पहुँच भएको अवस्थामा उत्पादनमा आफ्नो पहुँच नभएका महिला शक्तिशाली पुरुषहरुबाट शासित हुन पुगे । त्यहाँबाट सुरु भयो पितृसत्ता ।

शासन जोगाइराख्न पुरुषहरुले आफु अनुकुल सामाजिक नियम र संस्कारहरुको विकास गरे । विस्तारै त्यही नियम र संस्कारले पितृसत्ताको रुप लियो । हो यहि संस्कारमा हुर्किएका महिला र पुरुषमा त्यहि सोचले जरा गाड्यो । अनि त्यहि सोचले घर बनाएको हाम्रो दिमागले महिला पुरुष सरह स्वतन्त्र भएको, प्रतिष्ठित पदमा रहेर काम गरेको, चित्त नबुझेको विषयमा फरक बिचार राखेको रुचाउँदैन । अझ आफ्नो जीवन जीउने शैली आफ्नो इच्छाअनुसार अपनाए त पचाउँदै पचाउँदैन ।

उल्टै समाजमा विकृति फैलाएको आरोप आउँछ कथित सुसंस्कृतहरुबाट । यस्ता आरोपहरुले सेकेण्ड सेकेण्डमा लाखांै महिलाहरुको चरित्रहत्या भइरहेको छ । हत्याराहरु भने खुलेआम आफनो दादागिरीको नाङ्गो तरबार बीच सडकमा नचाइरहेका छन् । यी हत्याराहरुलाई दिने सजाय के छ ? र कुन मानवीय अदालतले दिन्छ यिनीहरुलाई सजाय ?

एक प्रसंग जोडौं, मेरी एउटा साथी जो शिक्षित छिन् । विश्वविद्यालयबाट स्नातकोत्तर गरेकी छिन् । सामाजिक र आर्थिक अवस्था बलियो छ । यति हुँदाहुँदै पनि उनको वैवाहिक जीवन राम्रो भएन । समाजले सानैदेखि सिकाएको छोरी भएर सहनशील हुनुपर्ने नियमहरुको पालना गर्दा गर्दै एकदिन बिद्रोही बनिन् । श्रीमानको श्रृङ्खलाबद्ध यातनाबाट मूक्तिको लागि सम्बन्ध विच्छेदको निर्णय गरिन् । जे उनले भोगिन् शाब्दिक व्याख्यामा फिका नै हुन्छ सायद ।

हाम्रो जस्तो समाजमा सम्बन्ध विच्छेद सहज स्वीकारिँदैन । एउटा श्रीमानसँग सम्बन्ध बिग्रिएपछि महिलाको जीवन नै सकियो । उनका लागि संसारका सबै बाटाहरु बन्द भए । अब नयाँ सम्बन्ध स्थापना गरेर सुखी हुने ठाउँ नै छैन । जस्ता टिप्पणीहरुको ओइरोले महिलालाई झन् मर्माहत बनाइन्छन् ।

तर के पुरुषको लागि यहि सोच लागु हुन्छ त ? अहँ कसैले भन्दैन । ‘मर्दकी सातवटी’ भन्ने सोचबाट विकसित हाम्रो समाजमा एउटा महिलासँग सम्बन्ध तोडिदैमा पुरुषलाई केही असर नगरेको ठहर्छ । घरमा श्रीमती हुँदाहुँदै अर्को ल्याउँदा ‘मर्द’को उपाधी दिने यो समाज महिलालाई जीवनभर श्रीमानको दास भएको हेर्न चाहन्छ ।

प्रसंग फेरि मेरै साथीको । उ शसक्त भएर पनि उनलाई सम्बन्धबिच्छेदको निर्णय लिन धेरै गाह्रो भएको थियो । निर्णयकै लागि उनले एक वर्ष समय लगाईन् । घर, समाज, संस्कार र धर्मका नाममा हानिएका छर्राहरुबाट घाइते उनले ठूलोे साहस बटुलेर त्यो लक्ष्मण रेखाबाट बाहिर निस्किइन्, स्वतन्त्र जीवन जीउने अठोटका साथ ।

आफ्नो जीवन कसरी जीउने व्यक्तिको नितान्त व्यक्तिगत निर्णयबाट हुनुपर्ने हो । मेरो साथीले पनि सम्मानजनक जीवन जीउने स्वनिर्णय लिईन् । तर यो समाजको लागि भने एउटी महिलाले गरेको दुस्साहस बनिदियो ।

त्यसपछि उनले कथित इज्जत नजोगाईदिएको नाममा टिप्पणीका वर्षा खेप्नुपर्यो । प्रश्नका खातका उत्तर दिन तयार हुनुपर्यो । केही समयअघिसम्म उनले पाएको यातनाका विरुद्ध चुँ नबोल्ने समाज उनको स्वतन्त्रताको निर्णयविरुद्ध भने यसरी आइलागे मानौं एक्लै बस्ने उनको निर्णय गम्भिर अपराध हो ।

कतिले त त्यसको अरु केटासँग सम्बन्ध थियो, त्यसैले लोग्नेलाई छोडीसम्म भने । तर कसैले पनि सोधेनन् त्यो निर्णय लिनुअघि उनले कुन हदसम्मको यातना सहिन् ? त्यही कारणले उनी गम्भिर डिप्रेसनमा गईन् । डिप्रेसनको औषधी खानुपर्ने भयो ।

अब विश्लेषण गरौं, महिलाको मानमर्दन गर्न कति निर्लज्जताका साथ उत्रिन्छ यो समाज । आखिर महिलाको चरित्रहत्या गर्न यो समाजका पात्रहरु किन मरिहत्ते गर्छन् ?

अनि फेरि यो ‘चरित्र’ भन्ने शब्द महिलाकै लागि किन जोडिन्छ ? के चरित्र महिलाको मात्रै हो ? अनि महिलाले मात्रै चरित्रवान हुनुपर्ने ? जसले पलपलमा महिलाहरुकोे सपना, इच्छा र स्वतन्त्रता माथि कुठाराघात गरिरहेको छ उनीहरुलाई चाँही चरित्रवान हुनुपर्दैन ?

सभ्य समाज निर्माण गर्ने हो भने दुबै महिला र पुरुषले एक अर्काको अस्तित्व स्वीकार्न जरुरी छ । कसैको चरित्र हत्या गर्ने कसैलाई छुट छैन । र त्यसको लागि महिलालाई होच्याउने, उसको स्वतन्त्रतालाई उसको इज्जत र प्रतिष्ठासँग जोडेर धज्जी उँडाउने संस्कारको अन्त्य गर्दै नयाँ मानवीय संस्काराको सुरुआत गर्न जरुरी छ ।

    Comment Here!

Related NEWS
मुख्य खबर

पत्रकार महिलालाई फुटबल प्रशिक्षण

–महिला खबर– ललितपुर । नेपाल पत्रकार महासंघको महिला समितिले फुटबल प्रतियोगिता गर्ने भएको छ ।

कानून मन्त्रीले माफी मागे (भिडियोसहित)

–महिला खबर– ललितपुर । बंगलादेशमा डाक्टर पढ्न गएका युवतीहरुको विषयमा आफूले बोलेको कुराप्रति कानून, न्याय तथा

महिला सदस्यलाई भैंसीको पाडी

–महिला खबर– वनले विपन्न आर्थिक अवस्थाका महिला उपभोक्ताको आर्थिक उन्नतिका लागि भैंसी उपहार दिएको बताएको छ

एलबीटी भन्छन्, ‘हाम्लाई छिःछि र दूर दूर किन ?’

–महिला खबर– ‘एक त छोरी । त्यसमाथि फरक पहिचान भएकै कारण विभेदमा परेको छौँ’ उनीहरुले भने

दुई पत्रकारसहित सातै प्रदेशका अधिकारकर्मी महिला पुरस्कृत

–महिला खबर– पुरस्कार प्रदान गर्दै महिलामन्त्री थापाले नेपाली महिलाको राजनैतिक क्षेत्रमा सहभागिता बढे पनि सामाजिक र

Read more
ताजा अपडेट
© 2015.All rights reserved by mahilakhabar.com
%d bloggers like this: