बीबीसीकी चीन सम्पादकद्वारा राजीनामा


प्रकाशित मिति :2018-01-08 11:49:46

पुरूष सहकर्मीको तुलनामा असमान तलब पाएको भन्दै बीबीसीकी चीन सम्पादक क्यारी ग्रेसीले पदबाट राजीनामा दिएकी छन्।

बीबीसीमा ३० वर्षभन्दा बढी समयदेखि काम गर्दै आएकी ग्रेसीले एउटा खुलापत्रमा उक्त संस्थामा “गोप्य र गैरकानूनी रूपमा तलब दिने संस्कार रहेको” बताएकी छन्।

वार्षिक १ लाख ५० हजार पाउण्डभन्दा बढी तलब पाउने चर्चित कर्मचारीहरू पुरूष रहेको खुलासा भएपछि उनले बीबीसीले “विश्वासको संकट” झेलिरहेको बताएकी हुन्।

तर बीबीसीले “महिलाविरूद्ध नीतिगत विभेद नरहेको” जनाएको छ।

प्रतिरोध

ग्रेसीले बीबीसीको बेइजिङ ब्यूरोको सम्पादकको पद गत हप्ता त्यागे पनि आफू बीबीसीसँगै रहने बताइन्।

उनले भनेकी छन्, म टीभी न्यूजरूममा पहिल्यैको पदमा फर्किनेछु “जहाँ म आशा गर्छु मैले समान तलब पाउनेछु।”

म्यानड्रिन भाषा फरर बोल्ने चीन मामिला विज्ञ ग्रेसीको बजफीड न्यूजले प्रकाशित गरेको खुलापत्रमा लेखिएको छ, “बीबीसी, लाइसेन्स शुल्क तिर्ने तपाईँहरूको हो।”

“मलाई लाग्छ उसले समानतासम्बन्धी कानून तोडिरहेको र निष्पक्ष तथा पारदर्शी भुक्तानीसम्बन्धी संरचनाका लागि दिइएको दबाबको प्रतिरोध गरिरहेको छ भन्ने कुरा थाहा पाउनु तपाईँहरूको अधिकार हो।”

गत जुलाईमा वार्षिक डेढ लाख पाउण्डभन्दा बढी कमाउने सबै कर्मचारीको तलब सार्वजनिक गर्न बीबीसी बाध्य भएको थियो।

ग्रेसीले बीबीसीका दुईजना अन्तर्राष्ट्रिय पुरूष सम्पादकले आफ्ना महिला समकक्षीले भन्दा “कम्तीमा ५० प्रतिशत बढी” तलब पाउने गरेको थाहा पाएपछि आफू निरूत्साहित बनेको बताएकी छन्।

खुलासा

बीबीसीका अमेरिका सम्पादक जोन सोपेलले २,४९,९९९ पाउण्ड र मध्यपूर्व सम्पादक जेरेमी बोवेनले १,९९,९९९ पाउण्ड पाउने गरेको खुलासा भएको थियो।

ग्रेसी त्यो सूचीमा परेकी थिइनन्, जसको अर्थ उनको तलब डेढ लाख पाउण्डभन्दा कम छ।

खुलापत्रमा उनले लेखेकी छन्, “समानतासम्बन्धी ऐन २०१० ले समान कामका लागि महिला र पुरूषले समान तलब पाउनुपर्ने उल्लेख गरेको छ।”

ग्रेसीले महिला कर्मचारीमा “धैर्य र सद्‍भाव सकिन लागेको” बताएकी छन्।

बीबीसी मीडीया सम्पादक अमोल राजनले ग्रेसीको राजीनामा सो संस्थाका लागि “ठूलो टाउको दुखाइ” बनेको बताएका छन्।

साभार : बिबिसि

    Comment Here!

Related NEWS
मुख्य खबर

एचआइभी : कम जोखिमका महिलामा बढी संक्रमण

न त उनीहरु सेक्स वर्कर हुन् । न ड्रक्सका प्रयोगकर्ता नै । तर उनीहरुलाई

साइबर अपराधको जोखिममा महिला

–महिला खबर– ललितपुर । प्रविधिको बढ्दो प्रयोगसँगै पछिल्लो समय साइबर अपराधका घटना पनि बढ्न थालेको छ

बेचबिखनमा लैजान लागेका १० महिलाको उद्धार

वैदेशिक रोजगारीका लागि भन्दै बेचबिखन गर्न लैजान लागेका १० महिलाको प्रहरीले उद्धार गरेको छ ।

टोल टोलमा प्रहरी

–सर्मिला बुढाथोकी– दोलखा । दोलखा प्रहरीले टोल टोलमा प्रहरी कार्यक्रम अन्तर्गत महिला हिंसा तथा घरेलु हिंसा

उदयपुरमा पुनर्ताजगी तालिम शुरु

–महिला खबर– ललितपुर । उदयपुरको गाईघाटमा ‘लैंगिक हिंसा न्यूनिकरणका लागि खोज पत्रकारिता तालिम’ शुरु भएको

Read more
© 2015.All rights reserved by mahilakhabar.com
%d bloggers like this: